តើស្រ្តីមានផ្ទៃពោះ គួរទទួលទានអាហារអ្វីខ្លះ ដើម្បីឱ្យកូនក្នុងផ្ទៃមានសុខភាពល្អ?

១. សប្តាហ៍ដំបូងដល់សប្តាហ៍ទី៣ ៖ អំឡុងពេលពរពោះក្នុងសប្តាហ៍ដំបូងដល់សប្តាហ៍ទី៣ ស្រ្តីមានផ្ទៃពោះ ត្រូវទទួលទានអាហារឱ្យបានត្រឹមត្រូវតាមរាងកាយត្រូវការ ដើម្បីជំនួយដល់ឆ្អឹងខ្នង និងការលូតលាស់របស់កូនក្នុងផ្ទៃ។ ក្នុងនោះរួមមានបន្លែបៃតង ស៊ុត និងគ្រាប់ធញ្ញជាតិជាច្រើនមុខ។

២. សប្តាហ៍ទី៤ ដល់ទីសប្តាហ៍ទី១២ ៖ ក្នុងចន្លោះសប្តាហ៍ទី៦ កោសិកាឈាមក្រហមរបស់ទារកក្នុងផ្ទៃកំពុងតែរីកលូតលាស់ ហើយចាប់ផ្តើមលោតចង្វាក់បេះដូង។ ក្នុងដំណាក់កាលនេះ ស្រ្តីជាម្តាយត្រូវទទួលទានអាហារដែលមានជាតិដែកឱ្យបានគ្រប់គ្រាន់។ ទារកក្នុងផ្ទៃងាយជាតិដែកដែលមាននៅក្នុងសាច់ជាងជាតិដែកដែលមាននៅក្នុងបន្លែ។

ប៉ុន្តែបើអ្នកជាអ្នកចូលចិត្តទទួលទានបន្លែ អ្នកអាចទទួលទានទឹកក្រូចស្រស់ និងអាហារដែលសម្បូរវីតាមីន C បាន។ អាហារដែលត្រូវទទួលទានក្នុងចន្លោះសប្តាហ៍នេះ រួមមាន សាច់ ស៊ុត ទឹកដោះគោ និងអាហារសមុទ្រដែលសម្បូរទៅដោយប្រូតេអីន។ នៅចុងត្រីមាសដំបូង ខួរក្បាលទារកក្នុងផ្ទៃចាប់ផ្តើមលូតលាស់លឿនជាងកាយសម្បទាផ្សេងៗ។ ដូច្នេះអ្នកត្រូវទទួលទានអាហារដែលសំបូរដោយអាស៊ីតខ្លាញ់អូម៉េហ្គា3 និង DHA ឱ្យបានច្រើន។

៣. សប្តាហ៍ទី១៣ ដល់សប្តាហ៍ទី២៨ ៖ នេះជាដំណាក់កាលយ៉ាង ព្រោះទារកមានការលូតលាស់លឿនបំផុត។ ដូចច្នេះក្នុងរយៈពេលនេះ អាហារដែលស្ត្រីជាម្តាយត្រូ​វទទួលទានរួមមាន៖
អាហារសម្បូរដោយ បេតាការ៉ូទីន និង DHA ជំនួយដល់ភ្នែកទារក៖ ការ៉ុត ដំឡូងជ្វា ត្រីសាឌីន។
អាហារសម្បូរដោយកាល់ស្យូម ជំនួយដល់ការលូតលាស់ និងភាពរឹងមាំនៃឆ្អឹងទារក៖ ទឹកដោះគោ យ៉ាអួរ តៅហ៊ូ ឈីស ត្រីសាឌីន។
អាហារសម្បូរដោយវីតាមីន D ជំនួយដល់ការស្រូបយកជាតិកាល់ស្យូម៖ ត្រី ត្រីសាឌីន ទឹកដោះគោ។
អារហារសម្បូរដោយជាតិស័ង្កសី ជំនួយដល់ការផលិត ជួសជុល និងដំណើរការ DNA៖ សាច់ក្រហម សណ្តែក គ្រាប់ធញ្ញជាតិ និងទឹកដោះគោ។

៤. សប្តាហ៍ទី២៩ ដល់សប្តាហ៍ទី៤០៖ ក្នុងចន្លោះសប្តាហ៍នេះ ស្រ្តីជាម្តាយកាន់តែត្រូវការអាហារូបត្ថមច្រើនជាងធម្មតា ដើម្បីផ្តល់សារធាតុចិញ្ចឹមដល់កូនក្នុងពោះ។

អាហារសម្បូរដោយវីតាមីន K ជំនួយដល់ដំណើរការកំណកឈាម៖ ខាត់ណា ស្ពៃ សាឡាត់ ផ្កាខាត់ណាខៀវ ផ្កាខាត់ណាស និងស្ពៃក្តោប។
អាហារសម្បូរដោយកាល់ស្យូម និងម៉ាញ៉េស្យូម ជួយឱ្យឆ្អឹងរឹងមាំ៖ ទឹកដោះគោ ឈីស គ្រាប់ធញ្ញជាតិ ផ្លែប័រ និង ផ្លែចេក។
អាហារសម្បូរដោយជាតិរ៉ែ ជំនួយដល់សុខភាពសួត៖ អង្ករសម្រូប និងស៊ុត។
ដើម្បីសុខភាពមាតា និងកូនក្នុងផ្ទៃ ស្រ្តីជាម្តាយត្រូវការទទួលទានអាហារសម្បូរប្រូតេអ៊ីន វីតាមីន និង ជាតិរ៉ែជាច្រើនបន្ថែមទៀត ដែលមាននៅក្នុងបន្លែផ្លែឈើ សាច់ និង គ្រាប់ធញ្ញជាតិផ្សេងៗ៕